گرافیک دیزاینى ڕۆژنامە ئەلکترۆنیەکان و بەرپرسیارێتییە ئیتیکى و یاساییەکانى

Abstract

ئامانجى سەرەکى ئەم توێژینەوە زانینى ئاستى پشتبەستنى ڕۆژنامە ئەلکترۆنییەکانە بە گرافیک دیزاین و پەیڕەوکردنى ڕادە و ڕێژەى بەرپرسیارێتى ئیتیکى و یاسایى تێیدا، ئەم توێژینەوەیە لە جۆرى پەسن (وەسفى)یە بە ئامانجى شیکردنەوە و ناساندن و خستەڕووى گرافیکەکان و وەسفکردنى بە شێوەى داتا، پاش شیکردنەوەى لە ڕواڵەت و ناخى بابەتەکان، کۆمەڵگەى توێژینەوە بریتییە لە ڕۆژنامەکانى باس نیوز و پەرەگراف، سامپڵى توێژینەوەکەش بریتییە لە گرافیکەکانى ئەو دوو ڕۆژنامەیە لە بەروارى 1/2/2022 تا 28/1/2023، کە لەو ماوەیەدا بۆ هەریەکێکیان 91 نمونە وەرگیراوە و شیکردنەوەی ناوەڕۆک بۆ نمونەکان کراوە.

توێژینەوەکە گەیشتووە بەو ئامانجەی زۆرێک لە بابەتە ڕۆژنامەنووسییەکان گرافیکى بۆ کراوە، بەڵام لە ئاستى پێویستدا نییە و بەشێک لەو بابەتانەى پێویستیان بە گرافیک بووە گرافیکیان بۆ نەکراوە، هەروەها بە نزیکەیى سەرجەم بابەتە ڕۆژنامەنووسییەکان جگە لە یەک نمونە سەرچاوەى وێنە ئاماژەى پێ نەکراوە، سەبارەت بەوەى تا چەند گرافیکى بابەتەکە گوزارشت لە بابەتە ڕۆژنامەنووسییەکە دەکات، لە نیوە زیاتر زۆر ئاماژەى پێدەکات، بەڵام لەو لایەنەشەوە کە تاڕادەیەک و کەم ئاماژەى پێ دەکات، ٧٣ نمونەی تێدایە، کە نزیک دەبێتەوە لە نیوە، هاوسەنگى لە نێوان یەکە تایپۆگرافیەکانى گرافیکەکانیشدا لە ئاستێکى زۆر باشدایە.

لە بەشێک لە نمونەکاندا پێشێلکاریى ئیتیکى و یاسایى بەدى دەکرێت، لە پێوەری لایەنگرى، نیشاندانى قوربانیان و تۆمەتباران و کەسوکاریان، ئادابى گشتى و بەها کۆمەڵایەتییەکان، جنێودان و تۆمەت خستنەپاڵ و هاندان بۆ تیرۆر و توندوتیژى، بەڵام بەگشتى ڕەچاوى ڕاستگۆیى کراوە، لە هەمان کاتدا وردەکارى تاوان و ئامڕەکانى ئەنجامدانى تاوان بە گشتى نیشان نەدراون و سوکایەتى بە بیروباوەڕ و ئایین نەکراوە و زیان بە ڕێزى ئایین و ئایینزاکان نەگەیەنراوە